أسم مستعار ؟

أذكر اني حين بدأت بالتدوين ، كان لدي تضخم حنجري بحاجة إلى تنفيس سريع ، ليس لأنني لا اتكلم كثيرا ً ( فأنا كثيرة الكلام جدا ً، اطرب أحيانا لمجرد سماع صوتي ) لكنه تضخم نوعي بكثير من الأشياء العالقة ( حب مكبل ، و الاف المواضيع الجنونية ، اهتمامات من غير الممكن التصريح عنها ، وقضايا تهمني حتى الرغبة بالحديث عنها امام الكثيرين ) وعوضا ً عن أن أفتح دفترا ً وأكتب كما هي العادة دخلت البلوغر وكانت مدونتي الأولى .. ( موضوع ياسين بأخوية كان أحد أهم الأمور التي شجعتني حينها شوفو هون )  تصميم بسيط ، صورة الفراشة في مكان ما ، ألاف الصور على السايد بار ( كانت مزدحمة بطريقة مضحكة كنت أود أن أقول كل ما أؤمن به عن طريق الشريط الجانبي للمدونة ) والأهم الكثير من الصدق
بدأت أكتب ، دون الاكتراث بمن يقرأ  ، دون معرفة إن كان أحد ما سيقرأني ، أو سيغلق متصفحه نادما ً على الدقائق التي قضاها في مدونتي ، لم يكن لدي شيء لأخسره ولدي الكثير لأعبر عنه لذا كنت اًصدق . 

كانت الأفكار تفرقع داخل رأسي ثم إلى النشر .. دون المرور إلا  بقليل من الرقابة ( والخطوط الحمر .. ما متنا بس شفنا اللي ماتو * )
وقليلا ً قليلا ً بدأت أنتظر التعليقات ، أراقب ! بدأ أناس كثر من محيطي ، أناس يعرفون أنني // أنا // يقرأون يتابعون ، بدأت أُسأل أحيانا ً عن شخصيات في خيالي  واواسى على أحزان ِ اخترعتها ! بدأت تضيق مساحة الصدق ومساحة الحرية ..
ومع كل شخص إضافي يقرأ المدونة ، أصبحت الكتابة اصعب ،
لسببين الأول أنني فقدت الجرأة عن الكشف عن خباياي ، والثاني لأنني أكلت المقلب وصدقتو وأصبح همي أن أثير إعجاب الناس .
حتى أصبح لدي ّ في الفترة الأخيرة فكرة أن أكتب مجددا ً بمكان جديد وتحت أسم مستعار ! لكن ماالذي كنت سأكتبه لو لم تكن تعرفون أنها أنا ؟ ولو لم اكن خائفة فعلا ً من خسارة ‘إعجابكم ؟ 

لو كنت أكتب باسم مستعار لكنت كتبت :

– لكنت تحدثت كثيرا ً بالسياسة حتى الملل ( اتمنى ان تتفهموا خوفي 🙂 )
– كنت شاركتكم ربما بعض النكت ” الشقية الزعرة ” التي أضحك لها كثيرا ً في الواقع
-لكنت اخترعت شخصا ً جديدا ً لأحبه ، متقلبا ً مجنونا ً غامضا ً .. وكتبت به آلاف القصائد الجديدة
– لكنت عبّرت مثلا ً كم يزعجني ” موقع المدون السوري ”  ..
– لكنت وصفت لكم الكثير من الأشخاص المزعجين في العمل ، في عيلتي ، في أصدقائي
– لكنت أخبرتكم عن الرجل الذي سرقني منكم في الفترة الماضية ولم اكن سأدعي أنه الملل
– لكنت خصصت زاوية للأسئلة والنصائح .. ( أنت تسأل ونحن نجيب ؟ إسألوا سنفورة الأمورة .. أو ما شابه ) وكنت نظّرت فيها حتى الاستمتاع
– كنت كتبت كثيرا ً عن الجنس ( ستقنعونني اليوم أن هذا الموضوع لايشغل تفكيرنا ، لذا نتفادى الكتابة عنه )
– لكنت قلت مع إحدى المدونّات .. ” يلعن إخت الحياة في رجلي .”
– كنت حتما ً انتقدت الكثير في سلوك الكنيسة اليوم ( لكن شعور الأقلية يربح هذه المعادلة الغبية ” )

– كنت كتبت الكثير من الأفكار التي لا اكتبها اليوم لأني أعتقد أنها سخيفة 

لو لم نكن نعرف من أنت في مدونتك ؟ أو لم تكن تود إثارة إعجابنا ؟ عم كنت ستكتب ؟

12 thoughts on “أسم مستعار ؟

Add yours

  1. ياستي معك حق .. الواقعية والوجود المادي شوية بيعطي تقييد وعدم أريحية بالتعبير .. بس بيضل النت أحسن من غيرو بكتير .. يعني فيكي تحكي شوية وتعبري عن الدوامة يللي براسك :)ياستي وأنا كمان بدي قول أخت الحياة برجلي وماحدا أحسن من حدا :)أنا عني .. كنت حكيت شوية على تفاصيل كتير بايخة بحياتي بس بتزعجني لدرجة تعكير صفو حياتي .. بس أنو يمكن مابيصير تنحكى وهيك باعتبار مو شي هادف ولا شي قيم ههههههتدوينة لذوذة جداً .. يسلمن حلو 🙂

    Like

  2. وِزْرُ المسؤولية على كتف المعرفة و السير حبواً كطفل أو واثباً لأمل يؤرق المبدع نسبة نجاحه و هل هو يكتب لعصره أو عصره لا يُدرك معناه و يبقى فكره كبذرة زُرعتْ لغدٍ أشجى مرسيل الإنسان الصادق مع ذاته هو الكاتب هو المبدع هو الذي يقود سمفونية الخلود بوتر من محبة و طيف من ذكاء بيد من أمل يصوغ كلماته لفجر عهد جديد إن الأنثى التي تمتلك شخصيتك مرسيل هي هدف أصبو له , اتمنى صداقته قد نملَّ ألوان الوجه و تتغير الأيام و تتغير الفاشن و لكن مرسيل نبض الحرف الصادق له متعة المتابعة الخانقة فكل جديد منه هواء لنفسٍ و إرواءً لظمأ خوفك خوف لنجاح أكبر لا من تعب و ما الاسم المستاعر إلا شيئاً من فصام ل راحة ننتقيها بعد مسيرة طويلة نحتاجها فنمل منها و نعود لرايتنا بالاسم المستعار تتبنين مشروع ثرثرة ( عن اصدقاء يزعجوني , نكت زعرة و و ….) لاأدب نقي ك نبعك كوني بخير طيفك استهوى خيالي *** فتَملكتُ العُلى بأسفاري و ظمأ النفس تعبي *** بركان حرفك هادئ ك رَمَسي

    Like

  3. عنجد كنت كتبت مثلك تقريباً ..صرت بحس إنو المدونة عم تقديني أكثر ما كانت من قبل مريحتني .. من قبل ما كان بهمني حدا ولا بخاف من حدا وبحكي وبعبر كيف ما بدي .. على فكرة كنت قول ما بهمني حدا بس بالواقع كنت انتظر بفارغ الصبر التعليقات والردود..هلأ صرت حس إنو هي المدونة صارت تعبر عن شخص بمكان ما .. من الصعب أقنع القارئ أن لدي الكثير من الشخصيات والأفكار المتضادة مع بعضها .. من الصعب يصدق إني عم أكتب بموضوعين مختلفين كل الإختلاف ضمن نفس المدونة أو حتى بنفس التدوينة ..بس مع هيك بعتز كثير إنو إلي مدونة وإني عم ساهم بنشر شيء ما عالنت ..شكراً مارسيل

    Like

  4. مرسيللا داعي لاسم مستعار ، بطريقتك هذه اوصلت ما تريديه وباسمك ..

    Like

  5. حتى الاسم المستعار بيتحول أوقات لقيد , يمكن لأنو القيد داخلنا أو لأن السعي نحو الأفضل مسيطر علينا حتى لو كان هالأفضل هو مجرد شيء أفلاطوني ما بينتمي النا ….. بالنهاية بزماننا نحنا مجبرين نخوض لعبة الحياة بهالطريقة وبقوانين مفروضة مسبقاًأو منضل خارج التغطية

    Like

  6. بشرفي كلام جواهر… عجبتني هي القائمة… بس اسا ما صار شي… يعني فينك تكتبي كل القائمة ما عدا البند الأول.. منسامحك فيه :)خالص الود..

    Like

  7. حلو . . مشكلة واقعية، بس الحمدلله انا ما عم عاني منها وعم اكتب بدون الإعتبارات السابقة إلا اعتبارات الرقابة الوطنية :)بس ما قلتيلي ليش زاعجك موقع المدون السوري ؟ رجاء بلا إجابات فنية 🙂

    Like

  8. عملتها قبلك و تركت مدونتي القديمة و مصر تماماً على إنو ما يكون معروف بشكل واضح من أنا ، رغم إنو صعب كتير أحيانا مع تراكم الزمن ، بس بصراحة كتير صعب واحد يحكي براحتو اذا في ناس بدها توقفلو على الدقرة .. على فكرة عمفكر أساوي أكتر من مدونة إلي و أكتب بعدة شخصيات مختلفة – نوع من انفصام الشخصية الانترنتي ، ليه واحد يكون عندو مدونة وحدة ؟؟ مشتهي أعمل مدونة تطالع كل الجوانب المظلمة من شخصيتي و أشوف حالي شو بيطلع معي ، الكثير من الكلام عن العقد النفسية الشخصية و النقد الحاد لكل شي بشوفو غلط

    Like

  9. @لولة —— أهلا اهلا ، وانا بتفق معك بكتير اوقات هيك انو بحس اني بدي فوت اكتب ، انو شغلة صغيرة جدا ً زاعجتني \” مرة يا اختي بدي اكتب انو قصلي شعري اكتر مما بدي ومقروقة \” ، عيب شو اكتب هيك ؟ والهيبة !!! يمكن نحنا بحاجة نكون \” حقيقيين \” اكتر عالقليلة بمدوناتنا يا اخي ؟ @ Aragorn———– اي حتى الأدب ، ليش لازم نكون عم نكتبو ونحنا مطالبين بأنو نقول مين هاد ؟ معظم اللي قروا كتابي ! قبل ما يقولولي حبوه أو لأ .. قالولي \” مين هاد ؟ \” يا اخي احيانا أنت بحاجة لمساحة تتخبى فيها \” لتكون عنجد أنت \” شي مرة بحياتك تكون \” انت بالمجرد هيك \” بس أنت ! @مستر بلوند ———–نبهتني لشغلة ! احيانا بحس التدوين بيسجل قناعتنا بلحظة معينة وبيتركها بيأرشفها ووقت بتتغير ، بتناقض نفسك بتخانقها .. بيصير بدك تبين لحالك عالقليلة انك متماسك فما بتنزلها ..أي وانا كمان كتير فخورة بحس بلمحات .. اسمي بدون ألف !!!!!!!!!!!! 😛

    Like

  10. @ناسداك ——— اي هي الصورة المجملة ، بس التفاصيل هي اللي بتجعل هالأمور مهمة .. @SooS——— 🙂 حلو .. @ Mais———– اي طبعا ً لانو منحاول نرسملو صورة مثالية هو كمان ! يمكن يفضل الأنسان هو نفسو يطلع خارج التغطية اوقات 🙂 بيصير أحلى العمر هيك

    Like

  11. Somar——– اي ما تتهرب أنت شو بتكتب ؟ 3bdulsalam———-ما في إجابات فنية في كتير أسباب ، رح حاول اكتبها بهالكام يوم الجايين طيب شو رايك ، مشان نطور أداء .. نحمس هالناس ونكتب تدوينة \” ما يعجبني ولا يعجبني في المدون السوري \” منها يمكن تكون بوابة انو نطورو بس إذا بدي لخصلك ياها ، محاولة حياد ما عم تزبط ، وغزارة افكار مع قلة تنفيذ .. arabexpresso————حبيت فكرة الانفصام ! فيك تكون مبدع لك فيك تتخيل حالك ! نيوتن أو نابليون او حتى سميرة توفيق

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Up ↑

%d bloggers like this: