تحشيك

يلعن أبو عبد الحليم خدام ، والبيانوني ، والاحزاب الدينية قشة لفة ، وجماعة رفعت الاسد فردا فرداً ، والحريري ورفقاتو ، واميركا واسرائيل والدول الاستعمارية من بدء التاريخ لهلق إذا بدك ، يلعن ابو هتلر وعنترة و يهوذا الأسخريوطي ..وبندر بن سلطان مشان ما ننساه يعني ،
يلعن ابوهن مية مرة ، ولولا الحيا لما توقف الأمر عند ابهاتن  ! بس ما بيعني هالشي أنو إذا هدول في حياتنا ، ومرقوا بيوم من الأيام ع بلادنا يصير كل مين بدو يحكي كلمة يصير من جماعة هدول الناس !
هدول ما اخترعوا مصطلح الفساد ، “ نحنا عم نشوفو كل يوم… وقانون الطوارئ جاية ع راسنا كلنا، و  يعني بدنا اعلام متل خلق وتعددية حزبية .. مو لأنو عنا جهات بتهوي متل اللي سبق ذكرها ،
ببساطة يعني لأنو هاد حقنا .. ووقت كنا بالبيت ربونا “ الولد اللي ما بيبكي امو ما بطعميه “ ووقت طلعنا عالمدرسة علمونا “ لا يضيع حق من ورائه مطالب “ حتى معلمتنا “ اللي يمكن كمان متواطئة “ كانت تكتبلنا حكمة اليوم “ من جد وجد “ .. وبالجامعة تخيل عندي مادة مندسة وعميلة ومستوردة اسمها “ حقوق انسان “ ، وبالكنيسة قالولي اني انسان وعأساس الله بيحبني ! فلهيك يعني هاد حقي !!!!

____
على الصعيد الشخصي جداً …
– الناس اللي شجعتني وقت قررت ادرس علوم سياسية “دراسات دولية “ ؟ كانت مفكرة اني رح احكي بالطبخ ؟
– شكراً لكل المهتمين !!!! بس بإمكانك توفير “ ديري بالك ع حالك “ صار عندي معها جرعات زائدة “ 15 مرة باليوم على تلت وجبات “ ، فواصلة تسلم .. “ وانت كمان “
– إذا انت مقتنع انو عنا حرية والوضع جنة ، ليش كلما بتشوفني بتقلي انتبه ع حالي ؟

14 thoughts on “تحشيك

Add yours

  1. كلامك حق وأنا معك .مرسيل ما بيهمني مين سبب هذا اللي نحنا فيه هلق من اللي ذكرتيهم أبداً، بنفس الوقت ما بدي يركبوا هدول بالتحديد الموجة إذا علت، مابدي انتقل من دلف الحالي لمزراب التالي.اللي شايفه وهذا رأيي أنو الصوت اللي عمي يحكي مشان حق مثل صوت مدونتك وكثير من الشباب عم يضيع بصخب الأصوات الأعلى، الأصوات اللي بدها تغيير لصالحها مو لصالح سوريا.هلق، في مين عم يطالب ويقول القانون الفلاني لازم يروح ، والقانون التاني لازم يتعدل، بكرا ممكن يجي مين يطجنا لستة قوانين واذا فتحتي تمك بيجاوبك \”ح تعترضي على كلام ربُنا\”.على كل حال ، بس تشلح الاحتجاجات (بصوتها الأعلى قميصها الديني) وتطلع خارج اطار المساجد، بيصير حكي تاني

    Like

  2. هاي مرسيل : أول شي بالحلبي هادا اسمه مسبات وبس..تاني شي معك حق بكل كلمة قلتيها وماحدا بيتبرع يعطيك حقك إذا إنت ماطالبت فيه.تالت شي بدي قول لكل مين عم يخاف من طلعة الاحتجاجات من الجامع وأنا أول الخايفين ويمكن أكتر منكم لأني من أقلية الأكثرية اللي إنتو خايفين منهم ويللي مفكرينهم حاملين سيفهم ومستعدين للدبح، تفضل احكي أو اطلع من الجامعة من الكافيه من البار إذا بدك بس المهم ارفع صوتك لأنو التغيير جاي جاي بكيفنا أو غصب عنا. نحن بلدنا من بقايا الحرب الباردة اللي انتهت من زمان. لذلك مشان مانسمح لفئة صغيرة (وبأكد إنها صغيرة بسورية لأنو مجموع الأقليات مع الشريحة المتدينة والمتحضرة من الأكثرية واللي صرلها متعايشة مئات السنين مع البقية) هي اللي تتصدر وتاخد البلد لمحل مابدها لازم تعلا أصواتنا كلياتنا. آسفة لكتر الحكي

    Like

  3. صح تماما ميرسيلبس يوراميوم جذبني تعليقك ، كيف يعني تشلح لباسها الديني؟ انت شايف يلي عم يصير الدين يلي محركه؟المكان ماله علاقة بالأسباب و الكلمات يلي عم تتردد بالشارع مالها مقتبسة من االقرآن . و يلي عم يعتقلوا و يموتوا ما عم يدخلو السجن منشان الصوت الأعلى الدينيفهما فهمت وين شفت اللباس الديني؟

    Like

  4. uramium——— ما أعتقد قدامن فرصة يركبو الموجة ، اللي عم يطالبو فيه الناس بجهة وهدول الناس بجهة تانية ، بالله خدام مثلا ً فينو يقنع حدا بسوريا أنو \” هو الحل \” ؟ ولا الاخوان المسلمين اللي في بتاريخن دم ؟ اي في كمية ناس ممكن تكون فعلا ً تتبنى الطرح ، بس من ثقتي بالشعب السوري أنه أوعى من هيك وبكتير كمان اي رح يطلع ناس تقول يوما ً ما انو بدها قوانين من نوع ما ، بس إذا منضل عنا هالخوف وما منحكي يوما ً ما هالناس بتكتر وبتكتر اكتر والاصولية بتكتر !! إذا الناس ما قدرت تنتما لسوريا رح تلاقي انتماءات تانية تعمقا وتقويا وتعلق فيها .. انا ما خايفة ع بلدي من الطائفية \” اللي ما بعرف شو ممكن تعمل ؟! \” بس خايفة اكيد عليها من التخوين وتسكيت الحريات و قانون الطوارئ \” لأنو شفتو لهلق شو عمل \” أما بخصوص المساجد !! من وين بدا الناس تطلع ؟الجامعة ممنوع ؟ الساحات العامة ؟ ممنوع ، حتى المباريات ملغية !!! يطلعو من الجامع أو يطلعو من بيتنا او يطلعو من وين بدن ، مدام شعاراتن سلمية و عم ينادو اشيا بتفق معها !! ما بقدر الا ما انحني احتراما

    Like

  5. الصديقة الغير معرفة .. ————————- اي استحيت اسب مباشر وخاصة اني عاملة قدام الناس كلاس !! لا تقرفي ! اي وبتفق معك بكامل الرد ويا هلا امنية : ———– بستنى يوراميوم يجاوب ! وأنا احمل نفس نظرتك على انو ما شفت طابع ديني فيها

    Like

  6. رح احكي عن دمشق كنموذج بما أني بعرف فيها منيح : التل ، دوما، جامع الرفاعي بكفرسوسة (تبعاً للمنطقة الجنوبية للجزء اللي بيغطيه) بتتذكروا هي الاسماء من ايام الجمعة الماضية؟ هي المناطق مشهورة من زمان بتشددها الديني والاحتجاجات بدأت منها، ومثلها الخالدية وجورة الشياح بحمص.رح ارجع اقتبس جزء من ردي فوق:\”اللي شايفه وهذا رأيي أنو الصوت اللي عم يحكي مشان حق مثل صوت مدونتك وكثير من الشباب عم يضيع بصخب الأصوات الأعلى، الأصوات اللي بدها تغيير لصالحها مو لصالح سوريا.\”في احتجاجات تانية طلعت اكيد مثل اللي صار قدام وزارة الداخلية كان صغير قياساً بالشي اللي عم أحكي عنه.كنت حابب تشوفوا هذا الخبرhttp://all4syria.info/web/archives/1955لو ماشفت اللي حكيت عنه بأول هذا الرد كنت قلت انو الافندي اللي مصرح هون عم يحاول أنه ينسب الشي اللي عم يصير لصالحه.. بس المسألة واضحة وهذا رأيي.مرسيلالاخوان المسلمين ما بيعترفوا عالدم اللي ملطخين فيه ، سألي واحد منن بيقلك هدول مو منا هدول جماعة منشقة عنا.أمنية بضيف عاللي قلته بالأول بما يخص ردكمارح احكي عاللي استشهدوا ، بس حتى بدرعا اللي خلينا نقول انها نظيفة الغرض ، مؤخراً صرنا نسمع شعارات مثل \”لا إيران لا حزب الله\”

    Like

  7. طيب مارسيل ليش واثقة من أن التيار الديني ضعيف بهال المظاهرات معظم المناطق يلي أنطلقت منها المظاهرات معروفة بتشددها . كمان غير المناطق يلي كانت تؤيد النظام مثل بانياس ودرعا وأختلفوا لأسباب أكيد مالا علاقة بالأصلاح .

    Like

  8. بجد بجد رايك فاجأنياولا يا رامي هدولة الحارات يلي عايشة بالفقر و الهم طبيعي تكون متشددة دينيا لأن بكل الكوكب دائما الفقر مرتبط بالدين ومع هيك مو ضروري ازا كانوا طالعين من هالأجزاء يكونوا متشددين دينيا متل ما عم تحكي لأن لما طلعوا بالشارع كانوا عم يرددو الله سوريا حرية و بس ما كانوا عم يقولوا الله سوريا اسلام و بس!! هي المناطق يلي منتشرة بسوريا و شايف تشددها الديني من باب بلبس و بحكي متل ابي و امي يعني ثقافات متوارثة وما بعتقد انو في تشدد ديني. وان كان فهدا شي طبيعي ، و هنن جزء من سوريا متل ما انت جزء من سوريا.تانيا ما بعرف شو بدي علق عالمقالة يلي مستشهد فيها ، يعني هلأ ازا طلع واحد من امريكا و حكا انو هي المظاهرات عم نديرها نحن رح نصدقوا؟ببساطة هلأ رح تكتر الافتراضات و النظريات و التحاليل تبع مين يلي عم يحرك الشارع السوري، وهي لحالها مسبة كبيرة فينا- يعني احنا مافينا مخ و نعاج في حدا عم يضحك علينا بقطعة شوكلا لنطلع؟ هي التحاليل هي واحدة من الاسباب يلي رح تفشل القصة – لأني بعرف انو القصة ما رح تكمل- و ببصراحة مالي فارقة معي مين يكون يلي عم يحرك ، المهم يكون : سوري : هدا همي ، و السوري رح يجر السوري التاني يلي متله او يلي مو متله . مافيني ادخل كتير بالحكي منشان ما اتشاطر عراس مرسيل .أمنية

    Like

  9. القضية أنو كلنا مع التغيير وهاد الشي ما لازم ننام عليه يعني إذا ما نهزينا هز ما بنحكي، هاد من جانب، ومن جانب تاني الخوف من الفوضى بحد ذاتها ورص الصف ما لازم يخلينا نرجع لتاريخ كلمة \”ايه يلله ماشي الحال\” ونسمح لشخصيات من وراء التاريخ تتحكم بأسلوب ومصير حياتنا.

    Like

  10. غير معرف / أمنيةفقيرة؟ إذا بدنا نرتب الأحياء حسب حالة اهلها المادية رح تكون بالوسط، قارنيها بالطبالة وال 86 وعش الورور واطراف الحجر الاسود ، هدول أفقر بكثير ..هدول تشددهم متعلق بأشيا تانية غير الفقر ، المهم:الشعارات مالها عبرة، جماعة الزنداني باليمن شو عم يهتفوا برأيك؟ بنهتف بالكلمات اللي بيتفق عليها الكل وكل مرحلة بيصير الها شعاراتا.مزبوط كلامك، مثلي مثلن وهم جزء من النسيج الاجتماعي السوري وحقهم يعبروا عن حالهم ، بس اللي مو من حقهم أنهم يغيروا هوية سوريا بالشكل اللي بيناسبني.بعدين تعي لقلك : المعهد الشرعي ، والمحطة الفضائية الدينية وإغلاق كازينو المطار؟ هي الإصلاحات اللي نحنا كنا ناطرينا؟ مين تحرك بموضوع الفساد لهلق؟ اللي عم يصير هو الشي اللي هنن بدن ياه يصير.أنا ما عولت على المقال، وقلتلك لو قرأته بدون أي شي تاني ما كنت أخدت فيه رغم أنو جهة مثل خارجية تركيا معلقة عليه.بكل الأحوال بتمنى كون على خطأ.صحي.. (هي خبر عالبيعة) نقلاً عن شاهد عيان رفيقي، بداريا بأحد الجوامع قاموا جماعة بعد الصلاة قال بدهم يكسرو محلات اللي بتبيع مشروبات مسكرة بالمنطقة علماً أنو داريا فيها حي كبير مسيحي، بس انلفت الحكاية قبل ما تطلع ، وشحطوهم…

    Like

  11. شو دخلني بجماعة الزنداني باليمن؟؟انشالله ينادوا بالشيطان شو دخلنا؟انا مالي شايفة تغيير بالهوية لسا و ان كان فهدا ذنب يلي ما حكا معهم . بكل بساطة وين صوتكم؟؟و كيف يعني ما انتبهت انو الرئيس عم يتوجه لكل طايفة و كل شريحة على حدا و يراضيها من مبدأ فرق تسد؟ ماشفت شو عطا الأكراد؟و شو عطا الموظفين؟ متل رجلي إغلاق الكازينو، بلد يكون فيها عدد الكابريهات و الكازينوهات أكتر من عدد الجامعات هي مو بلد، هي مسخرة.لك مو ليكون في مطار ليحطولوا كازينو!!الله يرضا عليك ، مو كل شي تسمعوا تصدقوا ، ازا ما شفت بعينك لا تصدق، نص الأخبار المنقولة كزب.ازا كم واحد حكا كلمة من يلي عقلهم مسكر مو يعني الكل ، وانت ادرى انو بكل طايفة مسيحي او مسلم في عالم عقلها مسكر و بتنادي بتكسير راس التاني، هون بيجي دور المتوازن عقليا يفتح تمو و يحكي مو يقعد يتفرج.أمنية

    Like

  12. اخي يورانيوم بس حابب قلك انو شي طبيعي انو يكون طبيعة المظاهرات اسلامية لانو اغلب الشريحة السكانية من المسلمينبعدين انا لمن بطلع وبقول ما بدي كبريهات ولا بارات بالمدينة تبعي بكون هيك متشدد حسب اخر معلوماتي انو حتى الدين المسيحي بيستنكر هيك اشياء، والاهل سواء كانوا مسيحين ولا مسلمين ما بيرضوا انوا ولادهم يربوا ببلد فيها هيك امور مخربة، ابني جامعات ابني كنيس ابني مساجد ابني شي يفيد ابني واخي وغيرو ويفتح مخوخهم مو يسكرها ويخليها ما تفكر غير بشهواتهابالنسبة للي عم يهتفوا ضد حزب الله وايران بظن انو معهم حق لانو حتى ايران الها اجندة معينة بدها تتطبقها متل ما لأمريكا ولا السعودية ولا غيرو الو اجندة وبدوا ياها تتنفذ كل واحد راكد ورا مصالحو ولا اذا يترجع لشعب كل بلد ما بدوا غير يعيش بأمان وسلام ويتمتع بالعيشة الكريمة والحرية اللي ما تؤذي او تتعدى على حرية الاخرينكمان وقت بنادي بحرية الرأي هاد ما بيعني انو بدنا نكون متل الدنمارك معليش اذا حدا طلع سب الرسول ولا شي صحابي ولا السيد المسيح ولا اي رمز يمثل اهمية لطائفة معينة اذا صار هيك وقتها بتنتشر الطائفية الحرية كمان لازم يكون الها حدود

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Up ↑

%d bloggers like this: