كلما سحبتني ع جنب .. ووشوشتني عرفت أنو نهاية الحديث مانا ع خير ، ببساطة لأنك كلما بتسحبني ع جنب بتحكيني بقصة من هالقصص
أول شي بتحكيلي قدي خايف عليي ، وقدي ممكن وممكن يأذوني .. انت عارف اني مستحيل احمل سلاح وأني وأني .. بس مصّر تقلي وتوعيني عن الأخطار الهائلة المحيطة بي ..
مع أنو أنا اللي المفروض آخدك ع جنب وقلك ، مادام عندك فكرة عن شو ألهن سنين عم يعملوا بالناس ؟ ليش ساكت ؟
أو
بتحكيلي عن مكاسب فئوية حققتا ، ألك او لعيلتك أو بأحسن الأحوال لطائفتك الدينية ، وبدك ياني أتفهم هالمكاسب وكرمال هالمكاسب أرضى وأسكت ، علما ً أنك مفترض أنو تنورتي القصيرة اللي بقدر البسها بالشارع وخصلات شعري هي مكسب !
مع أنو أنا المفروض اني ذكرك انو المواطنة أهم من المكاسب الفئوية ، و أنو مكاسبك على أهميتها ” إذا افترضنا أنها مهمة ما بتساوي جثث العشرين مليون ، وأني ما شايفة فايدة أني اقايض صوتي بخصلات شعري ..
أو
بتحكيلي قدي خايف من بكرة ، من الفوضى ، من الحرب الأهلية ، بالشهر الأول قلت بتفهم خوفك .. بالشهر التاني حاولت اني قلك إذا خايف حركلي حالك .. انت وشلة الخايفين واحكو شي ! بالشهر التالت والرابع صرت كلما تقلي قدي انت خايف من الفوضى .. حسك واحد نقاق .. بدك تضل خايف وما عندك استعداد تواجه خوفك بشي ..
أو
بدك تسألني إذا عنا بديل ؟ لك بديل لشو ؟ انت بدك اضمنلك المرحلة اللي جاي .. علما انو أنا وكتيرين عم نقاتل لتكون المرحلة الجاية صناعة كل السوريين .. مو وصاية جاية من فوق ؟ فكيف بدي اضمنلك شي ! انا بدي منك تصنعو معي أصلا ً ؟
لهيك .. حاج تسحبني ع جنب .. وتحكي معي ! أنا من زمان كان لازم اسحبك ع جنب ، أسألك ؟
لأيمت ؟
لمحات 
باختصار انتي رائعة كانو هالحكي الي بجد لايمت
LikeLike
يا عزيزتي لاهو مطلوب منو ياخدك على جنب ولا انت لازم تاخديه على جنبلاهو لازم يوصفك بالعميلة والمندسة وانت مالازم توصفيه بالجبان والخويف والشبيح وراكض وراء مكاسب شخصية.ببساطة هو شايف الامور من وجهة نظرو 6 وانت شايفتيها 9 فكل واحد يترك التاني ينام عالجنب اللي بريحوا اللي بدو يعارض يعارض واللي بدو يأييد يأييد مادام الكل تحت القانون.لانو اذا استمر الحوار في الشارع بهذا الشكل من الفوضى والخروج عن القانون من الطرفين فسنتجه الى ما لا تحمدعقباه والكل خاسر والبلد اولا واخيرا للجميع ولانها الك ولانها الو بس. ولك تحياتي
LikeLike
زكرتيني بكوتيشنز ظراف لفكتور هوجو :)[Progress] is the permanent life of all people. But it sometimes happens that momentary life of individuals is opposed to the eternal life of the human race.\”I exist,\” murmurs someone whose name is Everyone. \”I'm young and in love; I am old and I want rest; I work, I prosper, I do good business, I have houses to rent, money in State Securities; I am happy, I have wife and children; I like all these things and I want to go on living, so leave me alone.\”… There are moments when all this casts a deep chill on the large-minded pioneers of the human race.
LikeLike
حبيت بس امرق عليكي و سلّم بعد ما فاجأني عدد المعلّقين على مدوناتك مؤخّراً ليصل إلى صفر للأسف بعد ما كان الكل يعلّق و يشاركك احاسيسك و ربما احلامك.. شو صار للناس؟ كل هاد خايفين؟ ولّا إذا الإنسان وقف مع الحق ببعدو عنو؟ شو هالزمن هاد؟! شو هالذل اللي وصلنالو؟مع تحياتي لجميع المدونين اللي يمكن ظروفهم كتير صعبة بهالوقت و ربما بعضهم معتقل و اللي بعرف انو ما بقصرو..الله يوفقك يا رب.. وقفتك ما حدا بينساها.
LikeLike
نفس السحبة ع جنب ونفس الحكي والاغلبية الصامتة حتضلها صامتة … قربت مارسيل قربت بوسة لالك مني
LikeLike
بعض الشعارات الطائفية في المظاهراتhttp://www.youtube.com/watch?v=bjahckDY_iU
LikeLike
السيد غير معروف:بالنسبة للشعارات التي تصدر من بعض الشعب السوري وأنا مصر أن هذا البعض قليل جداًصحيح بمقطع الفيديو قايلين كلام طائفي بس هالكلام إذا كان صحيح بيكون جرى أول الثورة لأن الشعب كان أكتر الشي قاهرو هنن العلوية, بس هلق في كتير علوية أحرار وشرفاء وما بيرضوا بالظلم, والشعب واعي وما بتمشي عليه لعبة الطائفية وأحد جمع الثورة كان اسمها جمعة الشيخ صالح العلي
LikeLike