إذا انا وانت متفقين ، انو بدنا سوريا بلا فساد ، لنحاسب ” أنا وانت ” ، كل مين بيقصر بحق بهالبلد وبينهبها .. ومتلي مزعوج من الموظف اللي بيسرق ليمشي لك ورقة نظامية ، وابنك العسكري اللي بيدفع براطيل لينزل إجازة ، وشرطي السير اللي بيوقفك تبلي ..
وإذا انا وانت متفقين ، انو بدنا نحكي وما نخاف ، نقول انو الغلط هون ما مقبول ، وانا وانت متفقين أنو ما عاد بدنا الناس تنشحط مشان كلمة ، ولا تكتب وهي خايفة .. وانا وانت متفقين انو ليكون عنا اعلام متل خلق .. بدنا حرية إذا انا وانت تعبنا من قانون الطوارئ فوق راسنا وتشكينا منو ..
إذا انا وانت معصبين ع طول كيف الشباب السوري ، غير فاعل وغايب ومغيب .. وحزينين لأنو اخوي واخوك واختك اخدتن الغربة ليلاقو شغل متل الخلق و علم محترم وبكرة يمكن ولادنا مضطرين نربيهم ليربوا بعاد
وكمان مدام انا وانت ع نفس الصفحة وقت منتفق أنو كشباب ما معقول نضل عم نركض نركض نركض سنين لنجيب ابسط مقومات الحياة
ليش لكان وقت اللي حدا بيكسر حاجز الخوف ، وبيحكي اللي هلق قلنا انو نحنا متفقين عليه .. بتكون اول مين بيرفع حجرة وبيرميها بوشو ؟ أو بأحسن الاحوال ، بتحط ع عيونك شي لما تشوفو عم ينضرب ، إذا ما وصلت معك ترقص .. وتدبك وتزمر لأنو عم يموت !! كيف تحولت لمجرد اني عبرت عن اللي براسي وبراسك لخاين وعامل .. لتهديد لأمنك واستقرارك ؟
خايف من عنف يطالك ، صرت تصفق انت لعنف عم يقتل غيرك
خايف من اغلبية تلغي اختلافك وتقصيك ، تخليت عن اي احترامك لأي حدا مابيشبهك .. ما شايف شو عم يعمل منك خوفك ؟ ما شايف الانسان اللي عم تصيرو لمجرد انك خايف ؟
لمحات 
يعني جيتي اتدافعي عن اختلافك قمتي اتهمتي غيرك اللي عم يصقف انو عم يصفق لعنف عم يقتل غيرو. يا اختي بركي هو مقتنع ليش عم تتهميه ان خايف ومانو محترم وما بعرف شو.يعني هلق انت اللي كنت شجاعة ومدام شجاعة ليش ما نزلت وشاركتي مع اصدقائك اللي موخايفيين مدام مقتنعة وهاد حقك الطبيعي طبعا. بس الحكي ما في اسهل منو يا دكتورة!بعدين ليش بتشوفي طرف واحد من القصة يعني انا معك مو كل شي بيطالب بحقوقو هو عميل بس كمان مين قال انو النظام نازل عنف بالمتظاهرين الابرياء اللي ما عم يخربو شي. يعني ما فيكي تنكري انو باللادقية اكتر من سبعين عنصر امن مصابين بس لانو ما استخدمو العنف وكانو بلا سلاح وبلا شي واللي هونيك واللي كانو بالمشافي بيشهدو انو الامن ما استخدم العنف وهو كان الضحية من عنف الطرف الاخر طبعا الطرف الاخر مو المتظاهرين المو خايفيين رفقاتك بل من المخربيين المندسين.
LikeLike
اللي عم يدبك ويزمر وفي ناس بسوريا عم تموت واوضاع متوترة ؟ ع شو مبسوط بالضبط ؟ ليكا الساعة وحدة بالليل عندي ولسى الزمامير ما هديت ! انا ما قلت اني شجاعة ، انا خايفة 🙂 ، تخيل شعورك وانت بتحمل محبة كبيرة لبلد بس بتخاف تعبر عن هي المحبة ، بتخاف ع حياتك ، ع حريتك .. ع دموع ناس بتحبن .. انا ضد العنف بكل اشكالو ، وما بلحظة رح صفق لعنف تجاه اي جهة
LikeLike