دقيقة بس .. حادثة البيضا ؟

إذا كنت من اللي مقتنعين أنو من المسموح لأي انسان مين ما كان يدوس فوق راس حدا تاني ففيك تسكر الصفحة من هون ، هالصفحة ما موجهة الك فيك تريحني وترتاح .. اي قوي قلبك سكرها افضل لكلنا

هلق منرجع ، مادام انت لسى هون معناتا متفق معي ان تربيط الناس وبطحن عالأراضي وبعدين الدوس فوقن هو سلوك غير مقبول ، وخليني قلك هيك برشة عاطفية زيادة انو بيكون بيوجع وقت بتشوفو عم يصير بين ولاد نفس البلد

عم احكي عن حادثة البيضة فأرجوك ما تدخلني بالحيط وتشعبلي الموضوع لسياسة وتعقيدات

الموضوع ببساطة في واحد فهمان او متبجح او محسب حالو عنترة مصور فيديو ببانياس ” السورية ” وفيو عناصر أمن ” سورية ” عم تدوس على مواطنين ” سوريين ”

هلق نحنا قلنا لأ معقول ما بتصير ، مو عنا ” كلنا صدقني ” كلنا بكل ميولنا السياسية والفكرية ولك حتى الجنسية فكرنا أنو لأ ما تقولها هدول ما نحنا ، نحنا أجمل من هيك بكتير

وطلعت إلينا الدنيا بالخبر اليقين أنو هالفيديو هو بالعراق ، نصنا شكر الله انو منيح هالقصة مانا عنا والنص التاني عندو خلفيات معينة مع القناة او مع حدا تاني ما مهم قال لنبحبش ورا القصة نزلو صورو الساحة طلعت ساحة عنا ببانياس ، بديو يدورو ع الأشخاص اللي عم يدوسو طلعو كمان من عنا

ومن هون صار عنا شخصية جديدة ” البياسي “ ” بدك تشوفو بطل وتحط صورتو بروفايل بيكتشر ، بدك تشوفو مالو علاقة باللياقة وتسبو ” بس هو بيضل مواطن سوري وبيضلو انسان يعني

هلق تشعبت القصة وطلع البياسي وتأكدنا انو الحدث عنا مو بالعراق ، خاب امل بعضنا وبعضنا سكت وبعضنا انزعج |( كتبت كلمة تانية بس محتها الرقابة الذاتية )

هالبياسي صار مشكلة ، طلع خبر عالقنوات المدري شو بدا ” عم تقول انو مات ” ، بدك سبن معك لهالقنوات ؟” لأنن ما بيعنولي يعني لا هني ولا اللي تم ذكرها سابقا ً ، يعني النا شهرين عم نسب الاعلام فينا نكمل هلق نحكي بشي تاني ؟ ”

ورجعنا التلفزيون السوري طالعو عم يأكد أنو حي ، بس عم يأكدلنا بنفس الوقت انو الحادثة البغيضة اياها ، اللي تمنينا لو أنها ماصايرة ، صارت تحت أنوفنا ونحنا يمكن مشغولين نسب بعض

هلق إذا كنت انت من جماعة اللي بقلبن في شوية حقوق إنسان ، فما في داعي فند وقول انو اللي صار ما مقبول وبيستوجب محاكمة

هلق إذا كنت انت من جماعة الصمود والتصدي ، ففيك تكون مأكد ” صدقني صدقني ” ما في مواطن فينو يربح معركة مع العدو وهو مكسور وعم ينداس عليه

ما بيهم هلق اتجاهك السياسي ” اصلا من شهرين زمان معظمنا ما كان عندو اتجاه سياسي من أصلو ” المهم احيانا ً كتيرة بحوادث متل هي انو نبحبش عإنسانيتنا ونقول ” لأ ”

هني عم يقولولنا : يمين او يسار ، متشبث او متساهل ، كبير أو صغير أنا مع القانون

إن كانوا هالناس عصابات مسلحة ، بدنا يتحاكمو بالقانون

إن كانو هالناس متظاهرين سلميين ، بدنا يحمين القانون

واكيد أكيد “أنا وكتيرين ” بدنا اللي كان السبب بأنو هالحادثة صارت يتحاكم بالقانون كمان

2 thoughts on “دقيقة بس .. حادثة البيضا ؟

Add yours

  1. شفت صفحتك بالصدفة ، مابقدر اقول غير انها رائعة لأ هي أكتر من رائعة،،بكون كتير مبسوط لما بقرا كتابات لناس من شعبي بقدروا معنى كلمة الانسانية بعيد عن الديانات والطوائف ، كل الي بدنا ياه هو ابسط الحقوق الانسانية وهي حرية الرأي بعيدا عن التجريح والتخوين والحبس والتعذيب واحيانا القتل…شكرا كتير

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Up ↑

%d bloggers like this: