رأي آخر ..

من وقت ما بديت الأزمة وانقسمنا لفرق ، صار يتم الحديث عن الرأي والرأي الآخر بشكل كبير من حيث صار الكل عندو رأي وصوت وبدو يقولو وهادا حقو ، بس المفارقات بديت تبدا وين

– وقت يعني انت بتقول كل معارض بهالبلد خاين ، هاد ما رأي هاد تشهير وزم وقدح واللي بدك ياه يا عمي وشلف كلام كمان ..وإهانة

وقيس على هيك اتهامن انو كلن عملا وبيقبضو و .. إلخ ، فبرضاي عليك ما تسمعني هالموعظة وتقلي بعدين حرية الرأي ، حرية الرأي مانا بنوب حرية الاتهام المجاني للناس

– وقت يعني أنت بتقول انو اللي بالشارع بجم وما بيفهمو وبتسمعني موشحاتك الفنية عن تيابن وخلفيتن الاجتماعية فكمان مرة ركز معي هاد مانو رأي وبدك مني احترمو ، هي فوقية ومقيتة وما لابقتلك والله ، يعني كل الجمل من شعب ما بيلبقلو حرية ، لبيستاهلو الصرماية ، غير بالصرماية ما بينحكمو هي كلها مانها رأي ، حرية الرأي بحياتا ما كانت حريتك بأنك تشتم الناس

– وقت يعني بتقلي انو كل واحد معارض ، متظاهر ، عندو رأي مختلف بيستاهل دعس وحرقو وعفس ودفس .. وبتقلي يشيلو درعا عن الخريطة ، فهاد كمان مرة بعيد وبكررلك ” لأنو يبدو النا فترة ما عم نفهم ع بعض أنا وانت ” هاد كلو ما بيندرج ضمن حرية الرأي ، هادا تحريض وتسويق للعنف ..

– وقت بتفتح بسطة وبتقول كل مين بيحب فلان فهو وطني وكل مين ما بيحب فلان فهو بلاوطن !! ما شايف أنو هاد ما رأي هاد توزيع وطنية بالمؤسسة ؟هاد بيع وطنيات على بسطة وقرب جرب .. تجدون لدينا ما قد يعجبكم

– وقت بيكون خلاصة رأيك انو توصلي فكرة أنو ما بيحقلي احكي لأني من طائفة معينة ، من طبقة معينة ، جوا او برا البلد ، … إلخ هاد مانو رأي ، هاد مصادرتك لرأيي ومحاولة بايخة منك لتسكتني

– كمان شغلة ، ما شايف انو انت ما عندك مشكلة يعتقلو ناس لأنن قالو رأين ، وبيزعجك احزفلك رأيك من موقع على صفحة نت ؟

– رأيك على عيني وعلى راسي بس يعني تأكد قبل انو هاد رأي مانو شي تاني بعدا أنت ورأيك على عيني وراسي

في شغلتين قريتن وحبيتن كتير بهالفترة ، الأول للصديقة شيرين ، صاحبة مدونة طباشير

مواقفنا و آرائنا و غيره و غيراته ما ضروري تكون مشتركه أو تكون واحدة و لكن في اشياء انسانيّة متعارف عليها بديهيا ً .. بمعنى فينا نختلف بالرأي حول أي شي ، بس هي النقاط الانسانيّة بتبقى ” غير ملموسة ” – اذا صح التعبير – يعني ما بنقرّب عليها و لا حتى بنتناقش بخصوصها نظرا ً لانو هي من بديهيات  الوجود الانساني .. أمّا وقت بتم اختراق هي النقاط و بتستباح تماما ً و انت جاية تناقشني بأنو في تبريرات لهالشي ، تبريرات من أيّ نوع ، بصراحة رح تختلف نظرتي الك .. كتير رح تختلف ، مش لأنك بتختلف معي بالرأي ، أنما لأنو أنت عم تشترك مع المجرم بأنك تغض نظر عن الجريمة ..  بصراحة أكتر لأنو هي الجريمة اذا صارت بحقّي أنا انت رح بتضل ساكت و رح بتضل تلاقي تبريرات .. فكيف بدي اثق فيك يا صديقي – السابق ؟

2 thoughts on “رأي آخر ..

Add yours

  1. الشعب السوري بيموت بالسياسة والحكي فيها من يوم يومه , بس معلشي في عندي اعتراض على كلامك , أنك حاولتي تسمعي اللغة والاسلوب من الجهة التانية؟؟ , صراحة ماكتير رح تلاقي فرق مثل لهجة التخوين والحيث عن الانتماء الطائفي والتشكيك بالوطنية وتحقير الناس لانتماء لمجموعة معينة وطبعا الاتهام الظريف أن المؤيدين جاهلين ومابيعرفوا يفكوا خط ومابيفهموا بالانترنت ولا الكمبيوتر من أساسه , طبعا غير الشتم و التهديد وفيكي تتأكدي من هادا الشي , طبعا عند معظم رموز المعارضة مارح تلاقي هذا الشي , بس نظرة على القاعدة الشعبية لقلهم , رح تكتشفي هذا الشي . فالمشكلة برأيي هي ثقافة مجتمع , فيكي مثلا تقارني الكلام الحماسي والهتافات المخجلة يلي ردده أعضاء مجلس الشعب السوري وتقارني بالهتافات والصيحات والشعارات يلي قالوها المشاركين بمؤتمر المعارضة صراحة شي بيخجل من الطرفين , وهاي فضيحة بكل معنى الكلمة .

    Like

  2. chrisانا واقعة بالوسط بين الاصدقاء \” مو بالمواقف انا ابعد ما كون عن الوسط بالمواقف \” انا ما بسمع صديق لألي عم يحكي بشيل منطقة عن الخريطة لمجرد انو ناسها موالين للنظام ؟ بس بسمع اكتر من عشر اصدقاء ومعارف هني مع العنفطبعاً في لهجة اقصائية من الطرفين ! الناسنين معودين نحكي بسياسة بلد تاني وهلق عم نكتشف انو واخ سياسة بلدنا كمان ؟ عم نتعلم ع بعض

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Up ↑

%d bloggers like this: